اللوحة: الفنانة الأميركية كريستين كامبريا
القصيدة بصوت الشاعرة
وبتحلمي يا امه بضفايرك
مجدولين فوق الجبين
نخلة وضُلِّيلة
وبتحلمي شمس النهار
تلضم عنينا ف ضيها
تروي سنابلنا أمان
تطرح مواويل الأمل
لجل العيون الكحيلة
ضمينا يا ليلة
مجنون أنا بعيونك الحلوين
مجنون بحضن الضمَّة واللمَّة
وبتحلمي يا امه
وانا جوه حلمك بتولد عصفور
يكره هبوب الريح على ضلك
وانا جوه حلمك بتولد وجهين:
انتَ اللي وشك للسما مصلوب
وانا اللي ضي الهلال غُرَّاية في جبيني
قويني قويني
إيدك على زندي
هيلا وح نعدي
قلبك شراعي
وقلبي للأمان قارب
ياريح محوطانا
بتبعتري فينا
وتفرقينا في الفضا مجاريح
يا امايا لمينا
حِلِّي ضفايرك في مهب الريح
نزحف على شعورك
نسبح..
كما الطير اللي راجع للوطن بعد الفراق
وبإيدك الترياق
ضمدي فينا الجروح
واحلمينا..
شمساية في جبينك
قمراية في عيونك
وحمام يلملم ليلك المنتور على صدرك جدايل
يا قلبنا الواحد جمَّعنا جمعنا
وف قلبها ازرعنا
نخلة.. وضُلِّيلة.
poetspub.com 
معذرة..
لقد تأخرتُ قليلا بالورد والمنثور
ليست بعد المسافة، وليس حفيف الترنيمة..
الخفيف على القلب..
وليس لأنكِ سيدة الكلمة الشاعرة..
لأن هذا الزمن بالذات يحتاج الى هذه الترنيمة العذبة.
أتمنى مواصلة النشيد وأن أكون ضمن الباقة.
سأكتب وأرسل اليكِ.
بكل الود: وهيب
إعجابإعجاب