اللوحة: الفنان المصري كمال قنديل
ميسرة صلاح الدين
- شجرة المعرفة
متنكروش
إنى حذرتكم
إن النسخة
الجديدة منى
اللى انتوا
اخترتوا
تحبوها
هى النسخة
الوحيدة منى
اللى ماتستحقش
أى محبة
- على هامش السيرة
بتعمل إيه والدنيا بتكشر فى وشك
كل يوم الصبح من ستة لتمانية؟
بكون
تايه
زى ورقة بوستة
مبعوتة من فلاحة مسكينة
لابنها اللى بقاله سبع سنين
فى العاصمة
مبيسألش على حد
بتعمل إيه والدنيا بتكشر فى وشك
كل يوم تاني من تمانية لأربعة ؟
بكون
خايف
زى محفظة موظف
يوم 20 فى شهر
أوله المدارس
والعيد بيسن سنانه
وبيرفس وجع الباب
بتعمل إيه والدنيا بتكشر فى وشك
كل يوم كالعادة من أربعة لاتناشر؟
بكون
بعافر
زى عصفور رمادى
واقع فى إيد صياد قِرارى
مع إنه اصطاد
عصافير
كتير قوى
بس قلبه مش مطمّن
بتعمل إيه والدنيا بتـــ…….؟؟؟؟؟
بكون
انسان
تايه
خايف
بيعافر
ووجوده أصلا
فى الحياة
مافرقش
فى وجود أى حد
شاعر لو اقسم ع الشعر لأبره
بطريق مفتوح بين الأرض والسما
بقصيدة جديدة
تزقزق للفقرا
وتعلق زينة العيد على صدر المساجين
وترقع توب الوطن فيسترنا كلنا
شاعر لو اقسم ع الشعر لأبره
بعلبيتن الوان يقدر
يدوب فيهم تنهيدة البحر
وأسئلة البنات
وليلة اكتمال القمر
ويلون بيادات العساكر
بمشاعر أفتح
فلما تدب
تطلع مزيكه سيرك
مافيهوش فقرات مرعبة
ويلون أسراب الهليكوبتر
فتفك الكبت الميرى
بنوارس وفيونكات
ومشاعل خضرا
ويخلي الصواريخ لما تفرقع
يطلع من قلبها
رمان وفراولة وبطيخ ساقع
ويحول كل الجرانين الصفرا
لكراريس رسم
ويرسم جواها شوارع
باتجاهات معكوسة
علشان الموت والغربة
ييأسوا من مكر العناوين
شاعر يدفع فواتير
النور والميه
قصايد طازه
ويفرض سطوته ع الأطفال
فيقدروا معجون الأسنان
والأكل الصحي
وقلق الأم
ويفرض سطوته
ع البنى آدمين
فيحنوا ويرجعوا
بني آدمين من تاني
شاعر
بيقطع من حلمه الحي
ويطعمنا
واحنا بننغزه بعنينا
شك وتلميح واهانة
شاعر
قبل ما يظهر
كنا بنتمنى
يكون موجود وسطينا
ولما صبح وسطينا
اصبحنا
بنتمنى
يكون مش موجود
ميسرة صلاح الدين شاعر مصري وكاتب مسرحي ومترجم، صدر له العديد من الدواوين والمسرحيات الشعرية والغنائية، وحصل على عدد من الجوائز والتكريمات المحلية والعربية، كما شارك في العديد من المهرجانات والفعاليات الثقافية والفنية كمؤتمر الأدب السنوي الذي تنظمه جامعة كليفلاند الأمريكية، ومهرجان دبا الحصن للمسرح الثنائي بالشارقة، ومعرض أبو ظبي الدولي للكتاب، ومعرض القاهرة الدولي للكتاب وغيرها، ترجمت بعض قصائده إلى اللغة الإنجليزية والإيطالية والإسبانية، وقدمت العديد من نصوصه المسرحية على خشبة المسرح، له إسهامات متنوعة في مجال الترجمة حيث ترجم عدد من الأعمال الأدبية الهامة، منها رواية «شوجي بين» الفائزة بجائزة البوكر العالمية للكاتب الأسكتلندي دوجلاس ستيوارت و«رسائل ستيفان زفايج»، ورواية «الناقوس الزجاجي» للشاعرة الأمريكية سيلفيا بلاث.