اللوحة: الفنان الأميركي جان باسكيات
ميسرة صلاح الدين
- صدري وأنا حُر فيه
عايز أرسم خنجر
على صدري
خنجر طويل
مسنون
مشرشر
ببوز مكَّار
ورفيع
ومقبض عاج
م النوع
الكِشَرى
اللى مبيضحكش
للرغيف
السخن
أو أرسم
أسد
أسد كبير
بشعر
منكوش
وعيون غِلَّاوية
وحمرا
وأنياب متمرسة
على غدر الدنيا
والوقفة فى وش الناس
وممكن أرسم
أسد
أسد شايل خنجر
وأنا شايلهم
هُمَّا الاتنين
شايلهم
على صدرى
وممكن كمان
أرسم ست
ست ست يعنى
بقلب حنين
وتفاصيل سخنة
وشفايف مزهرة
تخاف عليّا
من النسمة
وتخاف عليّا
من الأسد
وتخوِّفني
عند اللزوم
وارسم كمان
بيت صغير
حواليه جنينة
وسور أبيض
وبنت سمرا
مسيِّبة شعرها
بتلعب على مرجيحة
وولد أصغر منها
بيلعب بكورة
يشوطها ف لمبة المدخل
تتكسّر ميت حتة
بس ماحدش يضربه
عايز أرسم
على صدرى
ست
وبنت
وولد
وبيت صغير
واحضنهم كل ليلة
وانام
مبسوط
- إنذار أخير
نفسي فى طيارة ورق
بس مش عارف
صرفت فلوس كتير
قريت كتب
اتفرجت
على فيديوهات
تعليمية
ولسه،
مش عارف
نفسي فى طيارة ورق
معايا دلوقتي
ورق بيلمع
شرايط ملونة
حتة دوبارة
وشوية خشب
نفسي فى طيارة ورق
اتحولت
مرة
لسحابة
علشان
يبقالى
خبرة
فى الطيران
واتحولت
مرة تانية
لطوبة
علشان
يبقالي
خبرة
فى الوقوع
ع الأرض
واتحولت
مرة
لشجرة
علشان
أعرف
أمد جذور
لأحلامي
نفسي فى طيارة ورق
بصراحة بقى
أنا لا نفسي
فى طيارة ورق
ولا حاجة
أنا نفسي
فى سعادة العيل
اللى بيطيرها
العيل الصغير
اللى ضحكته
لحد ركبه
أعمل ايه
دلوقتي
بالورق اللى معايا
والشرايط الملونة
والدوبارة
اللي لو فردتها
تقدر
تتحدى السما
أعمل إيه
دلوقتي
غير إني
أذوَّق نفسي
واطلع
على
سور البلكونة